الجمعة، 4 نوفمبر، 2011

فى حضرة الثورة

فى حضرة الثورة

*******

فى حضرة الثورة

قلبك يامصرى أنصهر

و قلبك ياضلمة أنقهر

على إيد شباب النور

وعلى قلبك البنور حط الحمام لابيض

اتعلق فى توب جلابيتك طفل صغير

عايز يملس على جناح الحمام

قومى دوقيه طعم الآمان

زفيه بالصبايا الحور

المؤمنين بالوطن

فى حضرة الثورة

***

فى حضرة الثورة

حسيت بك يامصر أكتر

وأنت بتعدى بوقت أخطر

الحرية بجد جايه تتمخطر

لابسه توب شعب مصر

من طل العشش والحوارى

من كل عمارة من كل قصر

من حناجر الهوانم والجوارى

م الفقرا والمحرومين ..

من كل ناسك المقهورين

سمعت عن شبابك الهمام

وفى الميدان شفتهم

فى حضرة الثورة

***

فى حضرة الثورة

مافرقش مين عن مين

اللى بيوحد واللى بيتلت

كلنا للأرض دى ساجدين

وحدنا بربنا والوطن كان دين

فى حضرة الثورة

***

فى حضرة الثورة

واحنا كلنا معاندين

أوعاك تكفر بالوطن ولا بالبنى آدمين

حضن الوطن للى آمنـــوا

مش للى يستعبدوا البنى آدمين

أنا أستمديت حريتى

من حضرة الثورة

***

فى حضرة الثورة

سقط النظام سقط الرئيس

ولسه هنفتح على أخره الهويس

لحد مانطهر بحرنا ونزيح من على قلوبنا العكاره

كل الشطوط قصادنا ونور الفنارة

بس أحنا نطهر قلوبنا ونخلص فى الطهارة

***

فى حضرة الثورة

شقت الأرض روحها وطلعت الناس..

تاخد ناس بالحضن ناس

وناس جنب ناس صبحت ملايين كتيرة

شب الشباب وأهتم بالجموع الغفيرة

ونا م اللى شفته فى التحرير.. مابقيتش فى حيرة

من 25 يناير لحد ماوصلت للجمعة الأخيرة

وروح الشهدا رفرفت فى مواكب ملايكة

باركت ثورتنا المُعجزة .. المُنجزة

فى حضرة الثورة

***

فى حضرة الثورة

الناس خدتها جلالة الوطنية

الكلام بقى بالمفتشر

ماعادتش حاجة متغطية

ياترى الشعب فجر ؟ .. ولا

دى جموع متحدية ؟

وتستاهل تنعم بحرية

فى حضرة الثورة

***

فى حضرة الثورة

عرفنا أن الوطن منهوب

واللى نهب كان فى النهب مغلول

ماكانش آدمى زى كل البنى آدم .. دا كان غول

ياريتك ياعدل تجيب العوج معدول

ماكانتش مصرى هاتتعدى الأصول

ويتلايم ع الغلة والمحصول

ولا وقفنا فى وش الظلم والظالم

فى حضرة الثورة

***

في حضرة الثورة

أفتكرت لإنقلاب على الملك

والضباط اللي قالوا معادش ملك

وراح الملك .. مبقاش فيه ملك

بأت جمهورية في أيد العسكر

وقبل ما يخونونا .. خانوا بعض

أفتكروا مصر تورتة وقسموها على بعض

ما خدناش حقنا م الأشتراكية

مشينا بالشعارات .. وهما قاعدوا ع التكية

في حضرة الثورة

***

فى حضرة الثورة

الشرطة ماقدرتش ع الطوفان

خرجوا بصدور تقابل الرصاص

وأرواحهم بتقابل الموت

خارج من حناجرها كلام لمصر

وبنفس الحماس وأملنا فى التغيير

أديت التحية ياشعب مصر

وتعظيم سلام لحضرة الثورة

***

وفى حضرة الثورة

نَفَسّك لابد و إنه يبقى طويل

وياخد ويدى بالك فى الئال والإيل

ومانفرحش بتورتة سقوط النظام

لأن ريحة فلوله لساها قاعدة ع المكاتب

ومدفوسة جوة المراتب عايزة تخطف حلمنا .. وأمننا

وزى مابعدوا الحقايق عننا .. غفلونا وأتغفلنا غصب ن عننا

ومين مننا ماخدش نصيبه م التوهه

ومين مننا ماعدش الساعات للفرج

ومين مننا ضمن رجوعه لو خرج

على رأى عم أحمد فؤاد نجم

لما كانت ساحات الجامعة تتجمع على عودك ياشيخ إمام

وقبل ماتوصل لـ حوش عيسى كل الشباب يتلم

والدم يجرى فى العروق ع الشباب اللى شال الهم

وحس طعم الوطن رغم المرار والذل

لحد ماقال كلمته ويّ كل شبابك يامصر

فى حضرة الثورة

***

فى حضرة الثورة

كنا نفهم بعض فى اللحظة

بدون كلام ولا مشـــــــاوره

أتلمت الأبدان دروع

فى وش خراطيم الميه والرصاص

ووابل قنابل مُسيل للدموع

كانت على آخرها الحناجر ..

تصد مكر النظام وكتر المناورة

حسـبوها احتجاج ومعارضة بتعاندهم

حسبوها مظاهرات والأمن هـ يفضها

حســـــــــبوا إن ليهم حد هايســـاندهم

لما كانوا مطمئنين والبـــــلد فى إيدهم

حسبوها ويحســــبوها زى مايحلا لهم

أنتفاضتنا فى ربــــــوعك يامصر ثورة

وحالفين لتكمل الدورة

فى حضرة الثورة

***

فى حضرة الثورة
بعد الشهور من وقتنا المعلوم
بانت الأجواء ملبده بالغيوم
ومحدش عايز يعرف ,,( ولا شئ بيدوم(
الوعود بتطول وتنفيذها معدوم
وقال مجلس وحكومة أنتقالية .. ياعيب الشوم
أهو الشعب قام وهيفضل يقوم
لحد مايلقى شئ واحد مفهوم
نبعد عن نظرية حاكم ومحكوم
ونطبق نظرية

قوم يامصرى يابن 25 يناير
ماتستناش ع الضرب اللى داير
محمد محمود ولا التحرير
لولاهم ماهلت البشاير
زعقت وازعق بعلو صوتك
الشعب يريد .. وما أدراك مايريد
فى حضرة الثورة
***
فى حضرة الثورة
أفتكرت الكورة فى الستينات
أفتكرت الضيف وسمير وجورج
لما غنولنا شالوا آلدو وحطو شاهين
طلع العسكرى وقال مش لاعبين
أفتكرت أصرارنا وحلم البشر فى التغيير
بيرهقوا فى إصرارنا لحد ما الحلم يطير
-:
لكن دا بـُعدك يا (مُـ شـ يـ .... )
مصر اللى جايه للشباب وشبابها كتير
وأحنا حابين نشوف مصر فى إيديهم
ويستلموا الراية م العواجيز
فى حضرة الثورة

********

الشاعر

محمدأسامة البهائى

ليست هناك تعليقات:

بسم الله الرحمن الرحيم

أحبائى الكرام أهلاً ومرحباً بكم قدمت هذه المدونة لتكون أشعارى وقصائدى بين أياديكم وكتاباتى المتنوعة متمنياً أن تنال رضاكم وارجوكم موافاتى بتعليقاتكم وآراءكم ولنجعلها جسراً للتواصل بينى وبينكم فأنا منكم وبكم .. مع الشكر وخالص تحياتى وتقديرى لكم جميعاً








أذكر الله العلى العظيم

أذكر الله العلى العظيم
خالد محمدأسامة

أذكرالله العلى العظيم

أذكرالله العلى العظيم
عمرمحمدأسامة

فنار بورسعيد

فنار بورسعيد
فنار بورسعيد القديم حجبته الأبنية العالية حالياً

بحر الكنال

بحر الكنال
مدخل بورسعيد لقناة السويس

أهلا ومرحبـــا بكم بمدينتى الغالية بورسعيد الباسلة

بورسعيد نغم الموج وسلك السمسمية

الأستماع لأحد الشعراء

الصديق عادل منسى متحدثاً

من ندوة شروق

من ندوة شروق

مع الشاعر عبد الناصرحجازى

خريطة القناة

للبحر لغات يتقنها البورسعيدية

أمسية شعرية

أمسية شعرية
لقطات لندوة صالون شروق