الخميس، 27 مارس 2008

قصيدة عزة نفسى


عزة نفسى

غاوية أحلام النخل أحلامى

تعلا بي لمراجيح الريح

والسواقى القلابه

قلابه

حادثات الزمن الغلابه

لقمه وكسوة وحبة فرح

وشئ م العقل يشييد فييا حصن منيع

وياسلام لو صرحك يفضل صرح

إيه إنسان ؟ إلا إن صح

مش دم ولحم وعيشه

طير فى ريح وريشه

جلد وعضم وتحويشه

وف الآخر فوركيشه

مرمى في قعر القفه

يحملها خفيف الريح

ويـزوفها

يسقيها

مرارة عزوفها

ويا طولة بالك

لما تشوفها

تـتسـرسب بيــك السـنين

ماتملكش للي فات

ولا للى جاى حنين

***

احلام كتير فاتتنى للأيام

هربت نفسى فى صرحى م الأوهام

وببات شامخ فى عزة نفسى

مانكسرش ، وأقبل

مانكسرش

واستكين بيأســي

أشب للمدى على فوق

أميل للعشق والشوق

شوق النهى والبدايات

ويا عالم ببكره والجايات

هالقانى وأنا بواجه موتى

لساني الصرح اللي بنيت

ولا ؟

حصاد اللي عانييت .

الأرض لفت بى ولفيت

ياما رحت وياما جيت

جوعت و شبعت وحفيت

أتعفرتت وأتهدييت

حلمت وتمنيت

حلو على مر لقيت

وهديت وبنيت

وصبرت واستنيت

لحد مابقيت

وياريتك ياموت تاخدنى

بس تعيش الكرامة .

ـــــــــــ

الشاعر
محمدأسامة البهائى

الثلاثاء، 25 مارس 2008

فين القاضى


فين القاضى
ــــــــــــــ
مرمى فى حضنك .... ماتدفيش
اعشق فيـكى. ... وماتحسيش
وسايبه عوازل تنهش فيا وتنهش فيكى
وشايفه بعينك مانتقطيش ... كلك طيش
عايزة الجد .... وجد الجد ... ومابدأتيش
باينه القصة زى الشمس
ومش محتاجه كلام بالهمس
ولا وشوشه ف ودان الناس
كلنا حبـيبه كلامنا بهمس
اللى عنـينــا تشـوفه اليوم
نفسو اللي شــافته بالأمس
ومن قبل مايجى اليوم والأمس
ماشيين ماشيين والسكة
السكة عذابنا بالممنوع
ممنوع و فى عز ألام موجوع
حد يخطى في الممنوع
حتى البص عليه ممنوع
ممنوع يتحاكى بحلم اللمس
حتى اللمس عليك ممنوع
واضح واضح قول مسموع
يا دوب تتلفت هنا وهناك
تلئا مصيبة بتستناك
تتنى ف حالك أو تتكووم مش هاتهم
ومش هايهم عليك لجل تهم
وطفح السم
في لقمة عيشك لما هاتيجى
هاتيجى ع القد
انشالله مابطنــك داقت شـبع
ولا صحييت ضماير شايفاك تتخدع
العيشة مرسومه لك
زى الصبيةاللى راقدة للجدع
قاعدة ف أرابيزك وأنت بتتخدع
حاطيين لك سيناريو بكل تفاصيل الملل
وكد بالمشاوير عينى عليك يادى الجدع
وحيد في بلد
عمدتها بمليون من كل العمد
(زرعت زرعي وقلعني عريان للسنين)
زعقت بعزم مافى هازعق لمين؟ ولا مين؟
توهت وتايه ع الأمل من غير أمل
وفى بلاد الغربة
بأزهد تمن
يا تعيش في قلبك نار
يا ترجع تاكل زلط
ويبقى لك كرش من قاعدة البيت
يا تدخل البراية
زى القلم الرصاص النحيف النحيل
اللى محطوط
ورا ضهره محايه تمحى فيك
ويا صبرك وأنت بتتمحا
فى عهد المهانة
والاستهانة بكل آدمي بيتولد
وآه لو عندك بنت و ولد
تشوف اللي عمرك ما شفته
وغصبـــــاً
ها ترضى وها تقبل
ما أنت قليل الحيلة
خليك فى اللى أنت فيه
ها تغرق وها يغرقوك
وقبل ما تشــنق
هايعلقوك فى قشـــه
والقشــة هاشة
والهشاشة فى العظام
طفحت م البرودة والرطوبة
بس طوبى للي عدا ع الهموم
ولملم فى نفسه
لم نفسه
من سكاته فى الهدوم.
تقولي راضى
أقولك
منين يا قاضى ومن ايه؟
منين ما تحكم بالحكم راضى
مشاكلي مشاكلي
ونظرةلايخدعك شكلى
أنا المليان لكن فاضي
وأنت إن حكمت حكمك يا قاضى
احكم بالعدل.
أحكم بالعدل يا قاضى .
ولو أنى خايف
لا ده
كمان
ماتعرفوش.!!

ـــــــــــــــــ

بالعامية المصرية
للشاعر
محمدأسامةالبهائي

قصر مله أبو نظرة عين


قصر مله أبو نظرة عين
ــــــــــــــــــــــ
شيح وفسوخة وفص لبان
الحلق أدوه للي بلا ودان
لموا الخايب علي الدهلان
ماتقولش يمام دا أبو الغربان
فتحوا القمقم لقو تعبان
قاموا طالعين جري علي رفاعي
هو يعزم واحنا نعزم
جالنا الهم الجو أتأزم
قمت شاورت عليه بصباعي
حقي أنا ها أخده ياناس بدراعي
واشفي غليلي من أوجاعي
مش ناقصين تعابين وافاعي
هاخلي السر بيني وبين أتباعي
الخير بين والشر بين وكل الدواعي
نفسر ياخلق هوووو ، ولا . ، مفيش داعي

هاتجيلنا أيام نشوفك في لمة كبيرة
ولايمكن تاخدك الأخادة لحته بعيدة
فتحت علي نفسك فاتوحة ومش قدها
دأنت مش قد الشعرا وعندها
فضايحك مالية الدنيا ومُصر تمدها
تقول قصاص تقول لاباص
دأنت وقعت أدشدشت يابلاص
المش ابو دوده بيشغي يابو دبابير أنشاص
تماحيك الفاضي وقال أدباتي أتباع باص اللى زيك
شوف لك ركوبه تشبه جنابك
و أدب فى روح سعادة اللى جابك
والذنب في حق شخصي قسماً لن يغتفر
قصر ملة ولا قصر طول ونظر يابو لسان متعاص
روح شوف لك باص ياخدك بعيد عننا
معرض وروحك هاتطلع بعيد عننا
مين اللي حط النقطة ياخونا فوق المعرضين الدواعي
مش ناقصين تعابين وافاعي
هاخلي السر بيني وبين أتباعي
الخير بين والشر بين وكل الدواعي
نفسر ياخلق هوووو ، ولا . ، مفيش داعي





كتبت هذه القصيدة فى رجل دخيل على الأدب والأدباء والمبدعين بكل إدعاءاته سليط اللسان قصير القامة ولمن يعرفونه تركت بالقصيدة إشارات ومناطق وعلامات ودلائل تشير إليه كثيراً مايجعلك تخرج عن شعورك مهما كنت من الكاظمين الغيظ أو العافين عن الناس منه لله






ـــــــــــــــــــــ
الشاعر
محمدأسامةالبهائي

قصيدة شنقت


شنقت
********
اخر مرة شربت شنقت
تقولي شرقت أأقولها شنقت
ف حلقى العطش المالح فاض وغرقت
اندلت من احشائى دموعى زى البنت
اندلئت منى فى بير السر غويط وكتمت
فى عز الحسرة دموعى ووجعى وجوعى
كل عيـون الأرض شـايفها الا دموعى
قـاد الفرح شـموع الأرض وطـفا شـموعى
ما كانش بطوعى فقرى وجوعى وما أتعلمت
رحت مدارس وقلت هامارس عيشه واعيشها
لكن خبت
خبت وخيبة الراجل مين يسترها غير القرش
بـيت بحيـطان وسـقف وكرش
كل ما أسد ف شــق بيطلع كرش
وأنا ما انكرش ان عيـونى حبت تحلم
سبتها تحلم يمكن عشت
عشت وشفتنى منى اتفركشت
فركش فرفـش مين ويـايـا ومين الضد
اللي بانيت له أول خلق الله بيهد
بعد ماكره كل العالم فيه ، إيه ها يجد
ماعِرفش ياخدني تحت بطاطه معاه ويمد
مرة اتنين تلات مرات قلنا أكيد وأكيد هايسد
عرق النحس يجيب الفقر وغصب بـأ مد
ماكانش ف قلبى لبكره الجاى دليل ع الود
وأدينى باأعد ف حظى كسير م الجرح
أنت هاتقدر تكسـر لقمة تاكلها بملح
بس اولادك كاسرين قلبك مليون جرح
أيوا ولادك كاسرين قلبك مليون جرح
******************
مع تحيات
الشاعر
محمدأسامةالبهائي

شلال دم نازف م الوليد

شلال دم نازف م الوليد

شلال دم نازف م الوليد
بيجرى ع القبله
يلحق صلاة السما ع الشهيد
والغدر وابل رصاصه العنيد
بيواجه احجار ونبله
ولسه التراب بينز بالترتيل
وغاويه العيون تعما
تلم فيا الملايكه لعنان السما
أوصل بالجروح جراح
مش متلايم ع الصباح ...
ولا الجروح ملتئمه
ماعدش فاضل رصاص
ولا في النفوس إخلاص
وولادك ياوطن...
من بعض منتقمة
لعبة الكراسي والأموال
نصبت في غزة المدابح
وجرح القضية ع الوطن نائح
هوا الوطن لما فكر يضيع مننا
خان ليه الرجال من غير علمنا
خانتنا ليه الخيانه وضيعتنا
برخص التراب باعتنا
ياعلل علتنا .. من كتر فرقتنا
الأرض سايعه الهموم
واللي ضاع بيتنا
أصلى بجوارحي وبركوعنا
لعل دعانا للسما يخِلص
يغسل وش الأرض يطهرها
يغسلنا بكانا و كدبنا المفضوح
ياأمة نامت على دمنا المسفوح
شاقق روحي للسما وجروحي
من مواجع كون بحاله بح نوحي
بتلم فيا الملايكه لعنان السما
أواصل صلاتي للشهيد
طريح الجُبن والترويع
معراج الروح طوافه
ع اللي خانوه بالتطبيع
والقضية يافلسطين بتضيع
وصوت تراتيل اللقا
فايت ع البيوت بالعزي
تنطلق فى الفضا
أجراسك ياوطن بالأسى
وكراساتك يامحمد
لساها بلاها الحروف
حرف واقف يرسمك
بشكلك المألوف
وحرف فاتح قلبك الصغير لناس حبوك
عودك النحيل
لساه متكوم فى صدر أبوك
ماضاقش اتساعه
م الخوف عليك ياحيلة أبوك
البنادق .. طايشة
ورصاصاتها بيضربوك
لاحال ضعفك غدرهم
ولا عودك النحيف
المدنه مايله
وأنت راقد ع الرصيف
لجل ماتاخد بأيدك ... لباب الجنة , يامحمد .



ـــــــــــــــ
شعر
محمدأسامةالبهائي

الاثنين، 24 مارس 2008

فوت على يافا


فوت علي يافا


وأنا فايت بشـوارعك يا فلسطين
بكايا مالي القلب
والأنين ف العين
ها فوت قلبي ليافا
ولا ف عكا وف حطين؟
الناس مغلوبة هنا علي غالبين
طلعت ع الناصرة
وأنا فايت أنيني في حيفا
قابلت الوشوش اللي تِفِرّق بيها السنين
ملامحها بسمارها الخمري والإيدين
لساها عافئه ع الأرض موت ومش نادمين
آغير علي روحي
ولا أتمني يجي لي الموت
الخبز يابس ويا نيّ الزعتر
عشـا وفطور
وف مغارب الضلمة
تِعمّر قلوب العرب نور
ومنين ماتلمح
تلقي الخضار مالي الربوع
واقف مستني ع السكك
بانتظارنا للرجوع
وطابور دوريات اليهود
ملاحق نسيم الهوي
نشم ريحتك ياوطن
رغم البارود والحصار
وجدار الفصل
مايحوشش شوقنا وزحفنا
الصبر اللي بات يتعلم الصبر من شعبنا
خمسين سنه وعماله تزيد السنين الدموع
وكل شبر داق طعم المطر
حاضن سيل الدم الذكي
خادوني الرفاقه علي يافا
وأنا اللي غرقان في الوشوش
الموت بيطلع من الأرض والناس متمسكة
الخطر ملاحق في الصغار وبرضو ما أستسلموش
سألت إيه البلد دي
قالوا بفخرهم : أبو غوش
فقت علي طراطيش الكلام حمص رنت في وداني
قلت أنا أسف ماسمعتش من تاني
قالوا لي يازلمة أبوغوش بلد الحمص
قلت لهم خلصوني أنا في عرض المسلمين والنصاري
قالوا لي يامصري من وين ماتيجي لنا البشارة
والعرب كيفك ومش صابرين
القدس للي جاهد وللصابرين
فوت علي يافا لأبو العافيه
بيراسل في أمم مش سامعين


بالعامية المصرية
الشاعر
محمدأسامةالبهائي

حساب النفس

حساب النفس

يانفس ياجوايا ضنين
بركان و فيـه ملاعين
طالعين بيا ونازلين
قوليلى رايحين فين ؟
شاقق صدرى الضيق
نار وأوهام وحريق
جوايا صراخ وزعيق
والدنيا عما لا تديق
تايه وم التوهه بـرئ
ولو أنى فى بحر غريق
وضلمة فى كل طريق
شاقق صدرى الضيق
دى نفسى ولا لوامة
ايه آخرت الدوامة
عصية ليه النفس
يافطرة القلب الرقيق
الصافى مثل الحليب
ياكل حواسى الخمس
مارضعتـش بالمقلوب
نقضى العيشة هروب
وتبقى الحياة بالعكس
يانواجه يا أما نموت
بيعدى الوقت يفوت
وبكرةمش زى الأمس
الدنيا فريضة وفرض
ياكل نواميس الأرض
أنا نادم ندم النفس
ولسانى أنا الأنسان.
*************
آن الآوان ياعمرنا المجروح
تدب فى عروقى الروح
واطهر جوايا النفس
واطلع فوق فى العلالى
ميبقاش ميزانى خاوى
لامقهور ولا عندى يأس
وبالبشــرى للناجيــن
هاكون ع الروح أمين
وأكسر بنفسى نفسى
ماهى كسرة النفس عبادة
تغيير فيا كالعادة
يبقى لى طعم ولون
م ألعبش على كل لون
ومعاهم دوول و دوول
ماهو جوه النفس غوول
يركع لك وهوا كافر
بألف ناب بألف ضافر
ماحناش قد المهالك
وطريق الحق سالك
يانفسى دا النور قبالك
والجنة نادهالك
وعزة النفس مطلوبة
بتمجد الأنسان…
متاع الدنيا غرور
الوعد والمقدور
دنيا فى آخرها زوال
فيه جنة وفيه أهوال
الدنيا مليانه بالتوهه
ويانفسى
عذابنا فى التوهه
وآن الآوان تلملمينى
وتمحى من قلبى غليلى
وتعلمينى معنى الخير
وتخرجينى من ضلمة لنور
وصحبة الصبايا الحور
وشفاعة نبى منصور
خضر
بيديه الطاهرة البور
ــــــــــــــــ
الشاعر
محمدأسامة البهائى

خدنا الكاس ياغزة

بالعامية المصرية
خدنا الكاس ياغزة

في عز ما أكل العيش لهينا
وآخدنـا من بعض ومكتفنا
تصدقوا إن أحنا أتكاتفنا
اتكاتفنا ولحقنـا يوم م الزمن
من قبل الكون ما يفنى
بهزة
مع أن الموت مفيهش لذة
كدبنا على روحنا بأعترافنا
بمأساتنا الشديدة فى بعض
لا الصغيرين قادرين ع الكبير
ولا أى كبير مبطل
يخطفنا
بكينا .. واتعاطفنا
وشيطان مكتفنا
ومن عبطنا بنقول عرفنـا
عرفنـا وقرفنا .
أيوه قرفنا
اللى بيشاور عقله . ونضيفنا

وسيبك من بشر هَمْ مايِلذوا
عمره دم الفقير ع الوطن مايعزة
أبو تريكه بهدفه الجميل بايعنا
ليلة ماكانت فرحة شوارعنا
كانت شوارع غزة مش لذة
ملهيه جماهيرنا مش جاهزة
ودول أصحاب كرامة وتار
ناس غير ناس عايشين فى عزة
و أهللك هما أهلك ياغزة
أبليس ماعدش مصدق عمايله
دا شيطان بس الصهاينة بتوزه
عملتلِك ايه دموعنا ؟
وأنت متماسكة بكرامتك فى عِزة
وكل شبر مَغروس للشهادة والدم بذرة
الأباتشى بصيادين الموت في الجو منتشرة
وأحنا بنشرب فى كاس الأمم
الأفريقية الأمريكية مش هاتفرق
مالي أيدنا سبعين مليون رعشة
خرجنا فى يوم بليلة ..
سارجين عنينا بفرحة فوزنا فى الطزة (معناها الكرة)
خايفين لا حد يشد الفرحة منينا
منلقاش مين يحوشها زى المجاعة والدموع
زى الهزيمة ونكستنا يوم رجوعنا من سينا
عملتلِك ايه دموعنا ؟
وأنت مش لاقيه تسرجى البواقى م الشموع
وكل قلب فى مصر فِرح حتى اللى حسوا بجوع
مش هاتموتى ياغزة مرتين ولاهايقسموكى ضفتين
كان نفسى آجيلك بالبطاقة
من غير مانكسر فى المعابر أى طاقة
كان نفسى أصلى الفجر عندك
تيجي تصلى الجمعة عندى
بس اللى شفته فى الحقيقة وفى المنام
ناس وسحابه سودا من غير حمام
داخلين على الجامع برجليهم ومفيش امام
صحيت على الخضة اللى بتدوى
من آخر الأرض لحد عندى
لقيتك ياغزة واقفة تصدى وتعاندى
تصدى وتعاندى
تصدى وتعاندى
ــــــــــــــــ

للشاعر
محمدأسامةالبهائى





الملايكه بيسألوها

الملايكه بيسألوها
ــــــــــــــ
(مهداة إلى روح أمى رحمة الله عليها)
ألا ليه دموع عنيا محبوسة جوايا
ومابشوفش غير إنى عايز أرجع كل السنين
ما أنا أتعلمت من الحنين
والضيقة وقلة البخت وكتر النواح
كل درس والتانى ع اللى راح
مش هاتصدق لو شافتنى غرقان فى بحر من الجراح
مش هاتصدق إن دعاها ليا ماحققليش اللى نفسى فيه
سامع صوتها والملايكه بيسألوها .. تعرفيه؟
قولى لهم ده اللى حطيت شقايا العمر فيه
قولى لهم الكلام الحلو اللى كنتى بتقوليه من ورايا
قولي لهم زى ماكنتى بتقوليلى ياضنايا
سيبته وأنا عارفه أنه جاى ورايا والملايكه مصدقين.
قولى لهم ولو شفاعة
ما أحنا فى الدنيا محتاجين
وأبنك بقى واحد م المظلومين
ماشافش والى بيصحى فى ضميره دين.
ماشافش عدل يفتح بيباننا المقفولين
ماشافش حل يحل كرب المحرومين
وأدينى أتحرمت منك
يعنى كان لازم تقوليلى روح
إلهى مايفرق بينا موت
عارفه ياأما الكون دا ضيق
مهما ترمح عينى فى براحُه
بأشوف الدنيا قد الكف
عامله راسى حوايا .. ودف
مفيش حمل على أبنك خف
من بعد مانبعك جف
كتبتيلى وقريتى عمرى
ولا المتعلمين فى مدارس
وأنا اللى طلعت عبيط دلوقتى
كنت فى غفله ومش حاسس
أخلع وسخ وألبس نضيف
أرمح وأبعتر وماكنتش ضعيف
أرمى روحى ورا أى طيش
وأرجعلك وقلبك بيقول يالطيف
شفتى قد أيه دلوقتى أبنك ضعيف؟
شفتي قد أيه الحال يغُم ؟ يا أحن أم ...
مش هاأبطل أدعيلك وأنا اللى محتاج دعاكى
وحياة حنيني لـ لحظة واحدة من لوقاكى
ما هابطل أدعيلك .
ــــــــــــــــ

أبنك
محمدأسامة البهائى

ياروايحك الياسمين

ياروايحك الياسمين
ـــــــــــــــــــــــــــــــ
فايت الأحبة لمين ياروايحك الياسمين
عطرك بقالو حنين وحنينك ملانى حنين
صوت الكلام والونس وكل شيء حوليا
بأيـدك أتلمـس بيعـتـب عليـنـا
دى الـغـربـة مـــش لـيـنـا
***********
عطرالمكان أتغيرعطر السنين مبقـاش
وسؤالنا متحير ياما قلنا ماتفوتنـاش
عشنا السنين راضيين بالحلوة والمرة
لا مرة خدنا حنين ولا أشتاقنا بالمـرة
أدى أحـنـا مـــش قـادريــن
فايت الأحبة لمين ياروايحك الياسمين
عطرك بقالو حنين وحنينك ملانى حنين
صوت الكلام والونس وكل شيء حوليا
بأيـدك أتلمـس بيعـتـب عليـنـا
دى الـغـربـة مـــش لـيـنـا
***********
ياغربة يامفرقة بين القلـوب وقلبـى
أنا والله متشوقة لحبيبى يكون جنبـى
عشنا السنين راضيين بالحلوة والمرة
لا مرة خدنا حنين ولا أشتاقنا بالمـرة
أدى أحـنـا مـــش قـادريــن.
فايت الأحبة لمين ياروايحك الياسمين
عطرك بقالو حنين وحنينك ملانى حنين
صوت الكلام والونس وكل شيء حوليا
بأيـدك أتلمـس بيعـتـب عليـنـا
دى الـغـربـة مـــش لـيـنـا
***********
كان الدفـا بيضـم حبيـب وحبيبـه
سقتني حنان الأم ومن قلبـك الطيبـة
عشنا السنين راضيين بالحلوة والمرة
لا مرة خدنا حنين ولا أشتاقنا بالمـرة
أدى أحـنـا مـــش قـادريــن
فايت الأحبة لمين ياروايحك الياسمين
عطرك بقالو حنين وحنينك ملانى حنين
صوت الكلام والونس وكل شيء حوليا
بأيـدك أتلمـس بيعـتـب عليـنـا
دى الـغـربـة مـــش لـيـنـا
***********
لحظة فراقنا عشتها وأسأل ليه ولمين
حبيبتك وحشتها ها أستنى لأمتى وفين
عشنا السنين راضيين بالحلوة والمرة
لا مرة خدنا حنين ولا أشتاقنا بالمـرة
أدى أحـنـا مـــش قـادريــن
فايت الأحبة لمين ياروايحك الياسمين
عطرك بقالو حنين وحنينك ملانى حنين
صوت الكلام والونس وكل شيء حوليا
بأيـدك أتلمـس بيعـتـب عليـنـا
دى الـغـربـة مـــش لـيـنـا

***********

فايت الأحبة لمين ياروايحك الياسمين
عطرك بقالو حنين وحنينك ملانى حنين
صوت الكلام والونس وكل شيء حوليا
بأيـدك أتلمـس بيعـتـب عليـنـا
دى الـغـربـة مـــش لـيـنـا

بسم الله الرحمن الرحيم

أحبائى الكرام أهلاً ومرحباً بكم قدمت هذه المدونة لتكون أشعارى وقصائدى بين أياديكم وكتاباتى المتنوعة متمنياً أن تنال رضاكم وارجوكم موافاتى بتعليقاتكم وآراءكم ولنجعلها جسراً للتواصل بينى وبينكم فأنا منكم وبكم .. مع الشكر وخالص تحياتى وتقديرى لكم جميعاً








أذكر الله العلى العظيم

أذكر الله العلى العظيم
خالد محمدأسامة

أذكرالله العلى العظيم

أذكرالله العلى العظيم
عمرمحمدأسامة

فنار بورسعيد

فنار بورسعيد
فنار بورسعيد القديم حجبته الأبنية العالية حالياً

بحر الكنال

بحر الكنال
مدخل بورسعيد لقناة السويس

أهلا ومرحبـــا بكم بمدينتى الغالية بورسعيد الباسلة


بورسعيد نغم الموج وسلك السمسمية

الأستماع لأحد الشعراء

الصديق عادل منسى متحدثاً

من ندوة شروق

من ندوة شروق

مع الشاعر عبد الناصرحجازى

خريطة القناة

للبحر لغات يتقنها البورسعيدية

أمسية شعرية

أمسية شعرية
لقطات لندوة صالون شروق