بـ جرة قلم
ـــــــــــــــ
ـ 1 ـ
بجرة قلم
تدور فى ساقية
ترفع مية النيل فوق الجبل
وساعة م تعطش تدور ف دايرة...
من جوا دايرة تتعلق ف دايرة
لحد ماطلبك يتقبل
بجرة قلم
ـ 2ـ
بجرة قلم
تروّق أوجاعك
وتفرم كل مين باعـك
نهرك يجرى مايوقفوش سد
وساعتها ماتحسش بأى حد
تفرد فى طولك تفرد دراعك
لحد مايحل غيرك محلك
بجرة قلم
ـ 3ـ
بجرة قلم
يسكن بدنك جرح وألم
بجرة قلم يتحدد مصيرك
لا يخيرك ولا يستشيرك
وأنت م تصدق ...
تجرى تلحق قطر الزمن .. لتفلس
توالس تدلس تشخشخ ضميرك
تغافل تنافق تصحصح لغيرك
ليركب مكانك ويدخل مجالك
بجرة قلم
ـ 4 ـ
بجرة قلم
ضهرك يفردك ماتبقاش قنطرة
ماأنت عايز تبقى ابن الناس اللى ربت
تعبت عليك لحد ما تفلح فى العلام
وآن أوانها تفرح بك وأنت ملوهدومك
بيت ووظيفة وعيشة نضيفة ترضيهم
تتلاحق عليك الوسايط تعيش
ياتمشى فى سكة لانحراف وتهلس
وتلقى روحك تحت قبة البرلمان ..
بينوبك من كل وليمة نايب وتتبت
بجرة قلم
ـ 5 ـ
بجرة قلم
يخرس لسانك
ما أنت زى السيجارة اللى طالتها نار
تلسع وتدخن من غير ماتُحدث لاِنفجار
نزعوا منك فتيل اللغم
ويبطل مفعولك بحاجات تزاحمك تلبخك
تبقى فاضى وناس تانية ملبوخة تنفخك
بجرة قلم.
بجرة قلم
تقدر يكون لك اختيار
.............
. . ...
بجرة قلم
ـــــــــــــــــ
